حامد صديق، باحث بالمركز القومى للبحوث، هذا هو اسم الإنسان، الذى انبرى أثناء محاكمة مبارك، وقال إن الرئيس السوابق مات فى 2004، وإن من يستلقى على الأريكة الطبية فى القفص هو دوبلير مبارك، وطالب بعمل تحليل D.N.A للدوبلير ولعلاء وجمال ليثبت أننا لم نخلع المخلوع وإنما خلعنا دوبلير المخلوع، أما المخلوع الحقيقى فقد انخلع بنفسه من الحياة دون حاجة إلى ثورة تخلعه.
هذيانات صديق العبقرى تدفعنا إلى حفنة من الأسئلة:
إذا كان مبارك قد مات فى 2004.. أمال اللى فى المحاكمة دى كانت مناخير مين؟
إذا كان قد مات فى 2004.. أمال سوزان مبارك كانت بتبوس مين فى بطولة الأمم الأفريقية 2006؟
ومين اللى كان بيشرب الشاى مع الراجل السوهاجى، وسأله: عبّارة من اللى بيغرقوا دول؟
ومين اللى كان بيشرف على تزوير انتخابات الرئاسة فى 2005، وكل الانتخابات التالية حتى الآن؟
وكنا بنهتف لمين: ارحل يعنى امشى يا اللى ما بتفهمشى؟
ومين اللى قال: «ما دام فى الصدر قلب ينبض»، و«إنه ليحز فى نفسى»، و«لم أكن أنتوى الترشح».
والراجل اللى واقف ورا عمر سليمان، كان واقف وراه وهو بيعلن تنحى مين؟
ومنتخبنا كان كويس زى ما قال مين؟
ومين اللى قال على البرلمان الموازى فى 2010: خليهم يتسلوا؟
ومين اللى كان بيتعالج فى ألمانيا ومتصور بالبالطو الكحلى ولابس النضارة وبيمضى ورق مع زكريا عزمى، كأنه مش قادر يبطل شغل؟
ومين اللى كان كل شوية يقع ويغمى عليه ويقولولنا دى الأذن الوسطى عشان هو كان طيار؟
ومين اللى قتل واعتقل وعذب وأمرض وسرطن وأذل وأهان وسمسر وباع وقبض؟
ومين اللى هيلبس قريب البدلة الحمرا ليثبت أن الثورة فى طريقها للنجاح.
عزيزى الباحث العبقرى.. إنت شارب حاجة؟
محمد صلاح العزب
إذا كان مبارك قد مات فى 2004.. أمال اللى فى المحاكمة دى كانت مناخير مين؟
الأحد، 07 أغسطس 2011 04:55 م
مشاركة
اضف تعليقاً واقرأ تعليقات القراء
مشاركة
