كإنك تمامًا بتدّن فى مالطا
فى كل المسائل ما فيش أى غلطة
هتقلب دماغك هتختم بجلطة
وهتطلع بلادهم تمام التمام
علينا وعلى الطيبين السلام
وأكل المدمّس ومطّ الحرام
ولمّ السبارس وشدّ الحزام
وقطع اللسان اللى جوّا الدفاتر
وشطب الكلام اللى وسط الكلام
وضرب الدّماغ اللى ممكن تفكر
وكسر الدماغ اللى ممكن تنام
****
بتدّن فى مالطه وما فيش حدّ سامع..
ولا حدّ بان من شيوخ المقام
علينا وعلى الطيبين السلام
*****
كإنك تماما بتدن فى مالطه
وطبعًا هتطلع ضعيف الإيمان
بتدّن لوحدك
وتهتف لوحدك
وعايش لوحدك طويل اللسان
وداير تخبّط فى كل البيبان
وعمّال بتحلم بآخر بيان
بتدّن فى مالطه وما فيش حدّ سامع
وصوتك بينهج فى وسط الأدان
بتهتف لوحدك
وتدن لوحدك
ورايح لوحدك تموت فى الميدان
*****
كإنك تمامًا بتدّن فى مالطه
فى كل المسائل ما فيش أى غلطه
هتقلب دماغك هتختم بجلطه
وهتطلع بلادهم تمام التمام
علينا وعلى الطيبين السلام
و الكلام والزعيق
ما فيش حدّ جاهز يدرّب فريق؟
ما فيش حدّ جاهز ينجّى الغريق؟
ما فيش حد جاهز يقف ع الطريق؟
ما فيش حدّ عايز يزعّق فى مالطا
يجوز حدّ يسمع ويبعت دقيق؟
