محمد صبحى "تريند" بعد اعتذاره لأطفال الوطن العربى

تصدر الفنان محمد صبحى تريند الكلمات الأكثر بحث وتداول على موقع التواصل الاجتماعى "تويتر" بعدما قدم أمس حلقة إنسانية ضمن برنامجه "أعزائى المشاهدين مفيش مشكلة خالص" المذاع على cbc حيث استضاف صبحى طفلا من أطفال الشوارع ويدعى "آدم"، وقال: "هناك أشخاص تتعامل مع الأطفال كأنهم "آتب" فى ظهرهم هيتخلصوا منهم لما يكبروا".

وتابع: الاعتذار واجب للطفل المصرى، إحنا آسفين لما نعاقب طفل لما يشتم رغم إننا بنشتم عادى، قولنالك لازم تعمل اللى بتحبة وتلاقينا ندخلك لما تكبر الكلية اللى احنا بنحبها، احنا اسفين بنقلك لابد من احترام النظام وكل مكان نروحة نتعرف على المدير عشان لا نتبع النظام، هننتظر اية من طفل ابوة يضربة بقسوة مبررا انه يربية او مدرس مريض يمارس مع الطفل كل وسائل التعذيب وارد اننا نجد هذا الطفل يضرب كلب او قطة لأنه لا يتربى على الرحمة، ولما يكبر هيعمل إية مع الإنسان اللى مثله".

وأشار: زمان تأثرنا لما محمد الدرة اتقتل بخسة وندالة وآسفين أكتر من الدرة لـ إيلان الكردى السورى حصلنا إية ومشاعرنا فى ألف درة من ولادنا بيموتوا كل يوم فى العراق وسوريا وفلسطين كإن اكتب على دررنا ان تنفرط من العقد وتموت، والكارثة الكبرى الاطفال من 15 سنة اللى الغرب بيشتريهم ويجندهم ويعلمهم الارهاب ويهينوا الاسلام البعيد عن كل هذا، لازم كل طفل ياخد حقه من حقوق الإنسانية.

كما تضمنت الحلقة أيضا "سكيتش" تمثيليا جسد فيه محمد صبحى دور الأب لديه طفلان قررا عمل انتخابات داخلية فى المنزل وفاز الابن الذى أصبح متحكما فى كل شىء بالمنزل.