بالفيديو.. لميس الحديدى تهدى قصيدة "ست الكل" لروح عبد الرحمن الأبنودى

أذاعت الإعلامية لميس الحديدى، قصيدة "ست الكل" بصوت الشاعر الراحل عبد الرحمن الأبنودى.
وأوضحت لميس الحديدى، أن "ست الكل" من ضمن القصائد التى سجلها الأبنودى للقناة قبل رحيله، وأهدتها لروحه وأسرته والشعب المصرى، وذلك ببرنامج "هنا العاصمة"، على فضائية "سى بى سى".

وتقول كلمات الأغنية
توبك لاخضر
من قبل ما اشمه باتعطر
ياللى جمالك فى كل دقيقه بيتغير
ويخلينى اشتاق اكتر
والف دراعى امل حواليكى ..... واتخدَّر
وادفن يومى المرعوب ...... واغيب
ما اصحاش الا الصبح ان بشّر
ما اصحاش الا الديك ان يدّن
والفجر على طاقه ينّور
يا حبيبة الكل
يا وليفة الكل
ياللى ف عنيكى رشو الحنّه وزرعو الفلّ
خلوا اولاد احلامى تطل
يا حبيبة الكل
يا وليفة الكل
باتعلم منك اتصبّر وانا باتدبّر
انا جنبك واد عوّاد ومالوشى بلاد
ينسى فى دراعك ام عياله والاولاد
يحلم ببلاد واولاد ما انجبهم ولاّد
لكن انتى يا ام المغنى يا عايقه يا متجليه ف كل ميعاد
نغمك صيّاد
راجع شايل فى فلوكته كل كنوز البحر
نغمك فلاّح
رمى غلّه ف ليل وصبح لقى غيطه محمل زهر
ولأنى يا ست الكل حزين
وبادوق فى لسانى دقيق الطين
والخوف ع الولد وام الولد سقانى الحنضل
ان باض لى حمامي
لاجيب لك جوزين خضرين ... حلوين
واعلمهم يقفوا فى شبّاكك كل صباح
فوق الميه العطشانه شباب
فوق الورد الفوّاح
ويغنو سوا
يا هوايا ... لكل هوى
الصبح الغنوه تدق الباب
لو طيرناهم .... سبناهم حرّين
حيجونا بلحن خلاف اللحن
علمنى الليل ما ارميش الطير فى السّجن
ده الطير احباب... واصحاب.... واخوات... وابات.... وامات
وياويل من سجن الطير فى السجن .... ومات
تلعن فيه الاصوات
والشمس تسح عليه العمى فى عينيه

توريه ازاى الحزن على الاموات
وان راق الجو
واتعدل الحال واحلو
لاخدك فى مدينه
اجيبها لك على رجليها
مصنع مصنع
وسرايه سرايه
اجيبها لك
بعيالها السمحه بناتها الحلوه .... تشوفيها
وكتبها تتفرجى فيها
واما تتعلمى ........ تقريها
واجيبها لك زى عروسه متحنيه
والنجم اجيبه .... ارشه عليكى وعليها
لانتى شويه
ولا هيه على ايديا عفيه
من غير خاتم سليمان
انا اشيلها على كتافى وعضمي
واطير بيها
مصنع مصنع وسرايه سرايه اطير بيها
وانيمها لك فوق الجسر
انا مش بحلم
بس ادعى لربك يدينى ويديلك انتي
طولة العمر
ان قلت يا ليل الويل تانى بيعود
وبتلفحنى الاشواق
لولا جدعان عيّاق
ما بصو وراهم يوم ما اتفرد القلع
فى بحور النور السود
ولا لحقو يضموا الام
ويقولو كلمه تخفف حمل الهمّ
راحم يا صبيه يجيبو المهر
ويعدو نهر ف شهر ونهر ف دهر
علشان ما يجيبو المهر
ناس قالت راحو الهند
واهى ناس بتقول فى السند
وعباد بتقول عايشين فى حته بعيد
وعباد بتقول
اللى حيفضل منهم مكتوب له عمر جديد
من يومها يا ست الكل
وبقيتى حبيبة الكل
وليفة الكل
علشان ما تروحش ولاد الناس
تنداس
فى بلاد الليل وتدوق الذل