محمد عمر يكتب: لو شِلتى النَضَّارة

آه لو شِلتى النَضَّارة
واتمَلَّى فى سِحْر عينيكى
دى خسارة إن النَضَّارة
بتخبِّى أحلى ما فيكى

عسلى فى لونها.. نضارتك
بس عسل عينِك يحلَى
لو دمعة تسيل على خدك
أطعم م الشهد وأحلى

الرمشِ فى لون الليل
وحكايته بتبقَى حكاية
على عينك لمَّا يميل
يرسم أجمل ضِلَّاية

جِفنِك عاشق حسَّاس
يسهر وعينيكِ تنام
يحرس حتة من الماس
بتشوف أحلى الأحلام

فوق عينِك أجمل حاجِب
نِفسُه.. لِعنيكى يقرَّب
غيران من جفنِك.. دايب
علشان من عينِك.. أقرب

لون عينِك يمكن واحد
لكن يتشاف مليون
بتبصى لحاجة.. بتاخُد
مِن عينك أجمل لون

النظرة بعينِك سحر
يخلق فى الدنيا حاجات
والمعنى فى عينك بحر
أكتر من أى لغات

لو حتى عيونك تغفَل
بردو ساحرة وخلاّبة
مش ممكن أبداَ يحصَل
شمس تخبَّيها سحابة

من عينِك طالع نور
سر جمالك وحلاوتك
ليه النور المسحور
يتخبَّى ورا نضارتك؟

خايفة من الشمس عليهم؟
دى الشمس تخاف من نورهم
دا الضى كتير حواليهم
خلَّى الشمس تغِير منهم.