واقف بقالى يومين
يــا بحر مستنى
جثة لشاب جدع
واخد شبه منى
..
أسمر بلون الطين
اللى قسى علينا
وملامحه فيها وجع
من هَــم مالينا
..
قالى يا بــويا الدار
ضاقت بسُكــانها
والعيشة فيها مرار
واحنا مساكينها
..
هاركب شراع البحر
واهرب من العتمة
ادعيلى يابــا اوصل
والقى لشقاك خاتمة
..
وراح وفاتنى وحيد
وكسر معاه ظهــرى
كان سندى ووحيدى
يــا حزنى يــا قهرى
..
يـــا بحر حلفتك
بدموعى ونواحى
ترميلى طرح الموت
دانا ليل نهار صاحى
..
نفسى ادفنه وارتاح
واعرف مكان قبره
وادفن وأنا راضــى
صبرى على صبره
..
وأقول يا رب الطف
بينــا من اللى جاى
نلقى فى ليل الظلم
بالعدل طاقة ضــى
