وكتبت سارة "هحكى دلوقتى كل اللى حصل واللى عرفته فى الطيارة اللى رجعت بيها ورجع معانا على نفس الرحلة 742 الرحلة الأكثر أماناً فى تاريخ شركة مصر للطيران وهقولهم فى نقط :
- الطيارة فعلا كانت متحركة من الدمام ونزلت الركاب فى مطار برج العرب عشان تبدأ رحلتها للقاهرة، الخاطف ركب الطيارة من مطار برج العرب .
- اول لما الطيارة اتحركت، الخاطف راح لواحد من طاقم الضيافة وفتحله الچاكيت عشان يعرفه انه معاه حزام ناسف .
- المضيف طلب من سيف انه يهدى وقاله ان الطيار اللى معاهم صغير وممكن ميكونش عنده خبرة كبيرة وانه بلاش يدخله وهو هيوصله كل اللى عايزه عشان ميتوترش، وكمان عشان محدش من الركاب يعرف ويبدأ القلق والتوتر .
- سيف كان معاه ظرف فى تلات ورقات اتسلموا لكابتن الطيارة مكتوب فيهم ان الطائرة مختطفة وان فيها حزام ناسف وانه يغير من وجهة الطيارة ويتحرك على واحدة من البلاد دى (قبرص، اليونان، تركيا) .
- الطيار فعلا استجاب لطلبات الخاطف، ولحد اللحظة دى مكنش حد من الركاب حس بأى حاجة غريبة ولا عرف حاجة من طاقم الضيافة .
- سيف الحزام الناسف الوهمى اللى كان لابسه عبارة عن علب شامبو ولاففهم على وسطه، وفى ايده ماسك علبة بلاستيك بزارار ماسكها بصوابعه والابهام بيهدد بالضغط بيه على اللى المفروض انه ريموت .
- بعد ما الطيارة غيرت مسارها طلب سيف من طقم الضيافة انه يلم باسبورات الركاب اللى على الطيارة، ودى اللحظة اللى الركاب عرفوا فيها ان الطيارة مختطفة !
- الدنيا اتوترت بعدها ع الطيارة ونزلت فى قبرص وفى حد حاول يشتبك مع سيف فى خناقة بس طقم الضيافة كانوا بيبعدوه عنه .
- طول الوقت اللى كان بيبقى عايز يتكلم مع سيف الاسلام كان بيطلب ده ولو وافق بيخليه يجيله يتكلم معاه وده سر الصورة السيلفى !
- مفيش حد متكلمش ومشكرش فى اداء طاقم مصر للطيران للضيافة، وبالذات ياسمين المضيفة وبيرجعلها الفضل فى كل المفاوضات اللى حصلت مع سيف الاسلام، هى اللى اتصدرت فى الكلام معاه وهى اللى اتفاوضت كانت بتسايسه وتهديه وهى اللى طلبت منه ينزل الستات والاطفال، وبعدين طلبت منه ينزل المصريين بحجة الاحتفاظ بالاجانب وطقم الطيارة كوسيلة للضغط، وبعدين عرفت تنزل 3 من الاجانب واتبقى اتنين وهى والكابتن، وقتها اتحكى ان سيف حس انه اتضحك عليه لما لقى الطيارة فاضية، وفضل متحفظ عليهم لحد ما فى لحظة قالهم خلاص روحوا وانزلوا !
- جنسيات الاجانب على الطيارة انجليز وبولندين وايطالى .
- سيف مطلبش لجوء سياسى زى ما اتقال، واللى عرفته انه طلب الافراج فعلا عن بعض السجناء فى مصر ( حاولت اعرف ان كان قال حد معين او اخوان او نشطاء معرفتش)
- الطيارة بعد ما المطار اتفتح كانت المفروض تتحرك الساعة 7:30 بتوقيت قبرص يعنى 6:30 بتوقيت مصر واتأخرت فى الاقلاع ساعة ونص.
- التفتيش فى مطار لارنكا بعد الازمة كان شديد ومتوقع لكن الجديد اننا اتفتشنا ذاتى على باب الطيارة واحد واحد، فتحوا الشنط وفضوها كلها حتى علب الميكب
- تذكرة الطيارة بتاعتى كانت مكتوبة بخط الايد، ووانا بعمل تشيك ان وداخلة الطيارة اتشطبلى على مكان الكرسى واتكتب رقم تانى بخط الايد !
- ركاب الطيارة المخطوفة كانوا طول الوقت معزولين عنا، مجبوهمش للبوردينج غير بعد ما طلعنا الطيارة .
- الطيارات اللى بتروح رحلات قبرص طيارات صغيرة يدوب فيها صفين كراسى، لكن الطيارة اللى رجعت بينا طيارة كبيرة جدا وركاب الطيارة المخطوفة طلعوا فى الاخر، وركبوهم فى جزء تانى فى الطيارة.
- الركاب كان فى منهم اطفال وولاد صغيرة اوى، وكانوا طالعيين الطيارة فى حالة صعبة، كلهم مبيتكلموش، فى وجوم على وشهم، مضيفات مصر للطيران كذا واحدة فيهم كانت طالعة وعنيها وارمة وحمرا من العياط .
- ركاب طيارة برج العرب نزلوا بعدينا، ومخرجوش من المطار وطلعوهم كلهم على اوتيل يباتوا فيه .
- الطيارة اللى رجعت فيها كان عليها وزير الطيران ورئيس قطاع الامن وفريق الازمات الخاص بمصر للطيران اللى وصل لارنكا مع 7 ضباط امن الساعة 4، وطلعوا معانا على نفس الرحلة غير ركاب طيارة برج العرب وطقم الضيافة بتاعهم، وقائد الطيارة كان الكابتن احمد عادل رئيس شركة مصر للطيران، غير طبعا طقم الاخبار بتاع التلفزيون المصرى بمذيعيه ومعديه وكاميراته اللى شغالة طول الرحلة !
- ابراهيم سماحة كان نجم الطيارة وكنت عايزة اتصور سيلفى معاه بس قلبى مطوعنيش
.jpg "الراكبة سارة الشريف (1)")
.jpg "الراكبة سارة الشريف (2)")
.jpg "الراكبة سارة الشريف (3)")
.jpg "الراكبة سارة الشريف (4)")
موضوعات متعلقة:
- أحد الركاب: خاطف الطائرة لم يتعرض لنا خلال الرحلة إلى قبرص
