"اقرأ" قصيدة جديدة لـ"طارق سعيد أحمد"

خبى عيونك فى جيبك
واقرأ
اقرأ
برجلك الحافية
ملامح البحر
قبل ما يبقى لونه وردى
وينتحر القمر جواه
ويعيش
يتسكع فى البلكونات
وجناين الموج
الدافية
طعم الطحالب على شفايفك إيه؟
أكيد كل ما تروى ودانك صمت
هاتشوفنى معاه
بأقطف ثمار التين والزيتون
من على صدره المتقسم
مربعات
ودواير
2
تجويف مشاعرك
ماشى فيه
عنكبوت أخضر
غازل بيوته فى كل مكان
صايد تفاصيلك
3
قديمة ابتسامتك
غوانى فيها
العُمق
حفرت قبر لكل نقطة
مطر
بتلمع فى السقوط
اقرأ
اقرأ
4
انت الزمن الباقى
المكان الوحيد
اللى تقدر تمشى فيه خطوتين
انت
مافيش داعى لطرح الأسئلة
بطيئة التأثير
وتسمية حياتك
حياة
أو موت
حدد ألوان قوس قزح
قصف رموشك
على أد النظرة الأولى
أنت مش محتاج تكون
عنيد
اقرأ

موضوعات متعلقة..

- قصائد من ديوان "بالقميص الكاروهات" لمدحت منير