كل ستات مصر وبناتها بيحلموا انهم يستحموا، بس مش الاستحمام بمعنى انهم ينزلوا مياة و شاور جيل عليهم . الاستحمام بمعنى انهم يغطسوا فى بانيو مليان رغاوى واعشاب مهدئة ومرطبات بشرة، زى صباح كدة فى فيلم شارع الحب .
تقريبا خمسة بالمئة فقط من الستات هم اللى حققوا الحلم . اما الباقى فغالبيتهم اللى بيمثلوا حوالى أربعين بالمئة لم تتوفر لهم الفرصة للتفكير فى تحقيق الحلم ببساطة لان معندهومش حمام . الأربعين بالمئة دول عبارة عن عشرين تحت خط الفقر وعشرين على الخط . أما الستين بالمئة فهم أربعين منهم أول الطبقة المتوسطة يعنى حمام صغير او بانيو قدم .
اما العشرين بالمئة المتبقيين دول عاملين زى اللى رقصوا على السلم، دول الستات المطحونة ليل نهار، عندهم بانيو بس مفيش وقت .
محتاجين مركز قومى لحموم المرأة، يشرف ويباشر الحفاظ على حق المرأة فى الغطس فى البانيو . ولازم المركز يتزود بكل الصلاحيات اللازمة للحفاظ على هذا الحق . تخيلوا لو حد بيبنى عمارة، لازم ياخد تصريح بالموافقة من المركز، المركز سوف يلزم المقاول على مساحة ادمية للحمام وبالتالى مساحة الحمام المطلوبة حتلزم المقاول بمساحة مناسبة الشقة وبناء على هذا، الدور لن يكون مكدس بالشقق وبالتالى شكل العمارة من الخارج سوف يختلف . بالنسبة لتصريح الماء والغاز والكهرباء، المركز القومى سوف يباشر عملة ويمنع اى بناء بدون ترخيص مياة وكهرباء وبهذا لن تتواجد الأدوار المخالفة .
يتوجه المركز القومى للعشوائيات والقرى، يلزم الحكومة بتوصيل المياة والكهرباء وبناء مساكن جديدة آدمية بدل من العشوائيات التى تنتهك حقوق المرأة .
عند عقد القران، يلزم المجلس الرجل إلزاما مكتوبا بخط اليد أن يوفر الوقت الكافى للزوجة بأن تاخد غطس فى البانيو، وبناء على هذا سيلتزم الرجل بمساعدة زوجتة وإلا يتعرض للمساءلة القانونية .
المركز القومى لحموم المرأة سوف يتابع أسعار الصابون و الشامبو وكل الأدوات اللازمة للغطس فى البانيو، لازم تكون الأسعار فى متناول جميع السيدات . الغطس حق لكل امرأة مش الأغنياء فقط .
اما وزارة التربية والتعليم، يقوم المجلس القومى لحموم المرأة بالإشراف على المناهج وطرق تدريسها ويلزم الوزارة بالاهتمام بالتلميذ اهتمام كامل لتوفير الوقت الكافى للأم للغطس فى البانيو .
مسؤلية المركز القومى لحموم المرأة تتلخص فى أن يحافظ على آدمية المرأة لكى يتيح لها فرصة بناء الرجال مش اشباة رجال.
