خليك إيجابى.. ولو قعدت فى أى مكان وطلع لك بلطجى قالك عاوز «مينيمام تشارج» اعمل معاه السليمة واتصل برقم 19588، ده الخط الساخن لجهاز حماية المستهلك، والرقم ده بيرد على فكرة، اللواء عاطف يعقوب، رئيس الجهاز أكد أن الـ«minimum charge» فى جميع الكافيهات أو المطاعم أو الملاهى، هو عمل غير قانونى، وإن حضرتك لو بلغت عن أى مكان بيفرضه الجهاز هياخد ضده الإجراءات القانونية فورا، وهيتقفل، مع تحويل مسؤوليها للنيابة العامة، قولا واحدا، خليك إيجابى ومتخليش حد يستغفلك، وخليها تنضف.
من فضلك اشكر مصر، لأن فاتورة الكهرباء هتغلى تانى فى يوليو المقبل، والسيد محمد شاكر، وزير الكهرباء والطاقة المتجددة، قال إن الدولة تضع فى أولويتها محدودى الدخل، وإن الأسعار الجديدة التى ستطبق على الكهرباء فى يوليو المقبل ستكون عادلة، الحمد لله، شكرا يا مصر. هذه مرة من المرات القليلة التى يمكننا فيها الإشادة بوزارة التربية والتعليم بوقوفها ضد مافيا المدارس الدولية بالتأكيد على أنه لا يجوز تحصيل أى زيادة فى المصروفات المدرسية السنوية إلا بنسبة (7%)، وكذا تحصيلها بالعملة المصرية من جميع الطلاب مع ضرورة إخطار الوزارة بقيمة المصروفات.. خليك إيجابى واتعامل مع الوزارة لو ليك ابن فى مدرسة دولية وحاولت تشتغلك.
