بقدم واحدة عارية تظهر جرح عميق فى أسفلها وأخرى مقطوعة تجلس سيدة فى العقد الخامس من عمرها فى مطلع كوبرى بولاق أبو العلا بمنطقة الوكالة تبكى حالها ليلا ونهارا.
ورصدت عدسة "فيديو 7"، قناة اليوم السابع المصورة، السيدة ناهد عبد الرازق ذكى التى روت قصتها وهى تبكى من شدة الألم قائلة، "رجلى مقطوعة وعندى السكر ومحتاجة كرسى متحرك أعيش عليه.. العيال بيتحرشوا بيا وبيسرقوا هدومى وبيضربونى ومش لاقيه حد يحوش عنى".
واستطردت قائلة، "محتاجة بطانية وجلبية ألبسها أنا بموت من البرد ولا نموت نفسنا أحسن ونموت كفرا.. السكر مبهدل رجلى الاتنين بنام فى الشارع ومحتاجة مساعدة.. خدوا بإيدى أنا كان معايا 20 جنيه ادليتهم لواحد يجيبلى بطانية خدهم ومشى ".
ووجهت السيدة رسالة للمسئولين، "أقولهم ياخدوا بالهم مننا عشان ربنا ياخد باله منهم حرام عليكم سايبنا فى الشوارع زى الكلاب عندى 52 سنة ومش لاقيه حد يعولنى ولا دار مسنين تاخدنى.. أنا طالبه من ربنا الستر أنا ست وحرام لما حرمه تنام فى الشارع".
وتدخل أحد المارة قائلا، "لو محدش إداها أكل مبتاكولش ولادها سبوها وهى عاجزة ومحتاجة رعاية ولا تستطيع التحرك لدخول الحمام"
وقال آخر: "احنا شعب ميت وعايشين حلاوة روح.. بس فى الكورة حلوين أوى".
