فى كل حلم بكلمه
والنهارده الوقت طال
وكل مره بسأله
هو إحنا ليه بميت ألف حال؟
رد عليا الخال وقال
اسمع يا ولدى
الشعر مش قافيه وميزان
الشعر حكمه وموعظه
فى سطور كلام
الشعر فعلا موهبه
بس الهبه فى الاتزان
الشعر
عقل يموت على إدين الجبان
فى شعرا ياما اتعلموا علم الكلام
بس عيبهم
لو تعيبهم يستخسروا فيك السلام
يا ألف خساره لما الكدب
يسكن قلوب وِلْدْ إلعَلاَمْ
تلاقى الكدب فوق الحق
ملجمه بميت لجام
إنتم يا ولدى عصركم عصر الفتن
والعدل تايه فى القلوب
مش لاقى مطرح أو سكن
عايز تفوت من غير سكوت
خليك جمل
اصبر على الجوع والعطش
ولو حاولوا مره يوصفوك إنك بطل
حاسب يا ولدى السم ديما
راح يدسوه فى العسل
إنت يا بنى من الغلابه
والغلابه ناس كتير
عيبهم قلوبهم طيبه
والطيبه فيهم عيب كبير
بنص كلمه حنينه
الظلم يوهمهم بخير
اكتب حروفك للزمن
أنا كنت زيك تايه فى زحمة
الوطن
جيت م الصعيد على مصر
بلا مأوى وسكن
والنهارده بكلمك وأنا اسمى
خال
الناس على كتوفهم شالونى
وحالى عال
سيبك بلا استهتار عيال
طيب يا خال
ممكن سؤال
اسألنى راح أجاوب عليك
اسأل وقول إيه اللى بيك
بكرا وعد منى أجيك
اصحى شغلك بيناديك
وأنت ماشى فى الطريق
أى حد فى سكتك سلم عليه
