جوابات الاسطى حراجى القط
العامل فى السد العالى
----------------------------
إلى زوجتنا
فاطمة أحمد عبد الغفار
الكاينه فى جبلاية الفار
استعجلتى
فى ردك ليه
إنتى لو بتحبى
حراجى وباكيه
عليه
تستنيه
مش تبعتى
فى جوابك
جاز يولع فيه
كل كلامك
حاسس بيه
وعايش ليه
وضارب نفسى
ميت صرمايه
عشان أداريه
كل حكايتى
إنى بدور على
شىء تايه
ولما ألاقيه
هرجع بيتى
فى الجبلايه
وهموت فيه
خلاصة القول
أنا هبعتلك
تاجى تعيشى
معايا يومين
حضرى روحك
إنتى وعزيزه
والواد عيد
أهو بالمره
تشوفوا أسوان
والسد كمان
وأوريكى
كيف إديه
معلمه عندى
على الجدران
بلغى كل الكفر
سلامى
واسألى على أبوعباس
أوصل كيف للاسطى
حراجى
أهو كان عندى
ورجليه واخده
على السكادى
راح أبعت فى جوابى
الجاى
تمن الأجره وتيجوا
إزاى
........................
زوجك الاسطى حراجى
........................
