مفطّراتى.. ماشى بآلاتى
ويّايا طبله.. بانده يا أبله
عنتر يفطّر حبيبته عبله
ويّايا آله.. ماشيه بتكاله
شاعر يا خاله ومغنّواتى
مفطّراتى.. ماشى بآلاتى
بنقول له يا الله يا مأدّناتى
ادّن وكبّر.. الفول مشبّر
والباميه.. تسلم.. إيدين مراتى
لفّيت حوارى.. ساعة العصارى
ومشيت أغنّى فوق الكبارى:
● ● ●
يا إسكندرية.. قلبى فْ إِيديّا
مغرم وماشى لابس عنيّه
غنيت لناسك وطوب أساسك
غنوة محبّه جامعه الأحبّه
من سابا باشا للخمرويّه
بمبوطى أصلى.. ساند مفاصلى
وَصْلى ف غنايا.. ناسك معايا
ماشى ومنايا.. دقّة فوليه
رمضان جماعه.. بعد الإذاعه
نفطر ونمشى من غير نطاعه
ونبوس خطاوى أرضى الزّكيه
نوصل ميامى وقلوبنا ظافره
ويسحرّونا أهل العصافره
حمّص وتونه ومهلّبيه
ابنك ضناكى.. حافظ غناكى
واقف بروحى فى الليل معاكى
بمبوطى وانتو ساندين عليّا
واقف تملّى... وقت التجلّى
داير بصوتى بأهتف وأعلّى
قوم يا بن عمّى.. ليلتك نديّه
بحراوى قلبى.. والروح صعيدى
واللى يعادينى بأفرد له إيدى
فاتح وريدى باكتب نشيدى
ويغنى لأجلك البمبوطيه
عاشق هواكى يا إسكندرية
● ● ●
مفطّراتى.. ماشى بآلاتى
ويّايا طبله ومغنّواتى
بنقول له يا الله يا مأدّناتى
ادّن وكبّر.. الفول مشبّر
والباميه.. تسلم.. إيدين مراتى
