مسحراتى بصوتى أنادى
على الحبايب كل يوم
إصحى يا نايم وحد الدايم
جهز سحورك علشان تصوم
اسمعنى حبة شهر المحبة
شهر الكرم مش شهر نوم
ارمى المعاصى صحى ضميرك
وصفى نفسك من الهموم
دا شهر طاعة فيه القناعة
هيفوت عليك كإنه يوم
جدد عزيمتك بنية سليمة
بلاش تخرج منه محروم
دا فيه ليلة مش أى ليلة
بألف شهر انهض وقوم
طلع زكاتك واغتنم حياتك
اوعاك فى بحر الذنوب تعوم
شهر الإحسان شهر القرآن
اقرأ ورتل زيح الهموم
اذكر حبيبك وخد نصيبك
بالصلاة عليه الحب يدوم
اهزم شيطانك وطهر نفسك
قبل الممات وكون معصوم
وقول يارب ندمان وتايب
واستعيذ بالله من المذموم
