مفطّراتى.. ماشى بآلاتى
ويّايا طبله.. بانده يا أبله
عنتر يفطّر حبيبته عبله
ويّايا آله.. ماشيه بتكاله
شاعر يا خاله ومغنّواتى
مفطّراتى.. ماشى بآلاتى
بنقول له يالله يا مأدّناتى
ادّن وكبّر.. الفول مشبّر
والباميه.. تسلم.. إيدين مراتى
يا طيور مهاجره.. إيه كان هيجرى
لو كنا خدنا يا اسيادنا أجره
مش كان زمانّا.. عارفين تمنّا
رمضان أتانا.. بالليل دعانا
لبّينا أمره... صومنا وسقانا
عرقانه روحى من كُتر بوحى
افطر يا مصرى وانده سنوحى
قاعدتنا لمّه... ضحكتنا تامّه
من شر عينك.. يا ابو نظره سامّه
العِمّه عاليه... والأرض غاليه
والبنت داليا بالضحك ماليه
عبّ الحوارى.. قرب يا جارى
قصر الخليفه من غير الجوارى..
هذا أوانى.. جاى م البرارى
لفّيت حوارى.. ساعة العصارى
ومشيت أغنّى فوق الكبارى:
............
فطارنا عليك يا مولانا
يا أكرم من أيادى الدون
وأطهر من مُحيّانا
فطارنا عليك يا أعلانا
ويا أعظم من خطايانا
فطارنا عليك ولا نقدر
نخبّى عليك نوايانا
يا عارف سرّنا فى الليل
يا قايد روحنا بالقناديل
يا رافع ذلّ كلّ ذليل
وعازز كلّ غلبانه
فطارنا عليك ومين غيرك
يشوفنا وناسنا ناسيانا
فطارنا عليك يا مولانا
..............
مفطّراتى.. ماشى بآلاتى
ويّايا طبله ومغنّواتى
بنقول له يالله يا مأدّناتى
ادّن وكبّر.. الفول مشبّر
والباميه.. تسلم.. إيدين مراتى
