خالتى اللتاتة
تجيب فى سيرة فلان وفلانة كالعادة
تعمل شيخة حارة بسهولة كده وبساطة
بتسمع أخبار كل الجيران بجدارة
تسألها عن حاجة؟!
تجاوب فى الحال
وتقولك منين ولمين وفين وبكام
كأنها عايشه معنا ومعهم فى نفس الوقت تمام
فكرت تعمل فينا معروف فى يوم من الأيام
لا تحكى ولا تنطق حرف من الحروف
و لا كمان تنقل أى كلام
بس للأسف
فجأة!!
لاقتها لونها كده أتخطف
اتحشر فى زورها الكلام
وقطعت النفس
قلت لازم أعالجها علشان يرد فيها النفس
وتملا الدنيا تحية وسلام
ومش مهم بقى تنقل الكلام
والناس اللى حبتها حلفوا يذبحوا علشانها خروف!!
مش مهم يكون بكام
أصل بصراحة رغم أنها لتاتة
لكن دمها خفيف
وعامله جو كده لطيف
بنت بلد وجدعة وفى وقت الشدة
بتبقى ولا ألف من الألوف
تعرفها دايما من ضحكتها
تزعل عليها لو الضحكة فارقتها
خالتى اللتاته اللى عندها الأخبار كالعادة
شيخة حتتنا عمرها ما تطلع وتجيب فى سيرتنا
لو فعلاً من جوه قلبها حبيتنا
سلمت ضحكتها ودامت فرحتها
وتعيش وتعيش
وتبطل حشريتها !!!
تعيش فى حالها ملكة زمانها
لو تسمع كانت زمانها اتغير بقى حالها
وبقت الست الكاملة اللى الكل يتمنى مجيئها
يستفيد من عقلها ورازنتها وكمان حكمتها
ويمسك فيها ويحلف أبدا ما يسبها
أرجع وأقول للست اللاتاتة
عاشت محبتها
اللى حقيقى تعبت قلب كل حبايبها
بسبب حشريتها
نتمنى كده تقعد فى شقتها
ولا تجيب كده فى سيرتنا
يا سلام... يا سلام
تبقى حقيقى خدمتنا
