بث "تليفزيون اليوم السابع"، تغطية خاصة من إعداد إسراء عبد القادر وتقديم حور محمد، والتي استعرض خلالها التفاصيل الكاملة الخاصة بتصريحات الفنانة شيرين عبد الوهاب في أول ظهور لها بعد الانفصال.
وتابعت التغطية الخاصة، أن الفنانة شيرين قالت: الحمد لله أنا حلوة، أنا كويسة، بس كلام الدكتور اللى كان معاك أول امبارح كلام محترم، بس ما فيش مرض نفسى لكن فيه عدم اتزان، أنا نزلت شغلى علشان بناتى شافونى كده".
وأضافت: لم يكن أمامى غير كده، أنا حاسة إن دماغى بتفرز أفكار طول الوقت ولو سبت دماغى هتاكلنى، وأنا عملت كده لأنى ما كنتش حلوة فى عينيه، عملت كده علشان هو ما يشوفنيش حلوة، والفرق بين حلاقة الشعر والطلاق يوم واحد، حلقت شعرى قبل يوم واحد من الطلاق ودى مش أول مرة أقص شعرى، فاكر لما قولت إنى طالعة علشان أضحك الناس وقالوا عليا إنى كنت بتريق على البلد، كنت مدبوحة ودبحونى أكتر وقتها.
وأكدت قائلة، أنا أقصر فى حق نفسى لكن لا أوذى أحدا، ودى وراثة عن والدى، هو أصوله تركية وهما بيمتازوا بالقوة والجسم العريض والشعر الكثيف الأسود، ولما كان يزعل كان يشيل شعره كله، وأنا ورثتها عن أبويا، أنا غير أخواتى وأنا اللى حلقته بنفسى وبعدين جبت حد يخليه طول واحد.
وتابعت: الإنسان الحساس بزيادة ممكن يؤذى نفسه علشان يعاقب نفسه وأنا كنت بعاقب نفسى، أنا غلطت فى اسمى ومكانتى وقدرى.
